د خوست ولایت غلام خان بندر نباتي کرنتین مدیریت یو ټیلر بې کیفیته جوار بېرته پاکستان ته مسترد کړل
د خوست ولایت کرنې، اوبو لګولو او مالدارۍ ریاست د کرنیزو چارو آمریت اړوند غلام خان بندر نباتي کرنتین مدیریت یو ټیلر موټر جوار، چې له پاکستان څخه افغانستان ته وارد شوي وو، د خراب کیفیت له امله بېرته مسترد او پاکستان ته ور ولېږل.
د کرنتین مدیریت کارکوونکو د یادو جوارو کره معاینې او ارزونې وروسته وموندله، چې د کیفیت معیارونه یې نه پوره کوي، له همدې امله یې د وارداتو مخنیوی وشو.
د خوست ولایت کرنې اداره له ټولو سوداګرو غواړي، چې د باکیفیته کرنیزو محصولاتو واردولو ته لومړیتوب ورکړي، ترڅو هېوادوال له صحي او پاکو خوراکي توکو ګټه واخلي.
