د خوست موساخېلو ولسوالی کې د ناکو بڼونه جوړېږي

د خوست د کرنې، اوبو لګولو او مالدارۍ ریاست په هڅو «او،آر،ډي» مؤسسې په تخنیکي همکارۍ د خوست ولایت د موساخېلو په ولسوالی کې یوشمېر بزګرانو ته د ناکو متراکم بڼونه جوړېږي.
د خوست د کرنې، اوبو لګولو او مالدارۍ ریاست چارواکي وایي، چې یاد بڼونه د نشه یي توکو بدیلو پروګرامونو له لارې پلي کېږي او هڅه کوي د نشه یي توکو مخنیوي په موخه لوړ حاصل ورکوونکي (متراکم )  نور بڼونه هم جوړ کړي.
د چارواکو په خبره دبڼونو کرلو لپاره یي هر بڼوال ته ۷۰۰ نیالګي ورکړل شول او په نږدې راتلوونکي کې به په بڼونو کې د پایو او لینونو نصبولو چارې هم پیل شي.
دغه راز یادو بڼوالو ته په بڼونو د کرنیزو عملیو ترسره کولو، اوبو لګولو، سرې استعمال، هرزه وښو کنټرول او نورو اړونده برخو کې عملي او نظري روزنه هم ورکړل شوې ده او په راتلوونکي کې به هم د حاصل ټولولو، بسته بندۍ، سورت بندۍ او نورو برخو کې روزنه ورکړل شي.