د خوست د کب روزنې پر ۵۰ فارم لرونکو د کبانو بچي ووېشل شول
۲۶ زمری ۱۳۹۸
په خوست کې د کبانو فارمونو د ودې په حال کې ده او په تېرو څو کلونو کې په دغه ولایت کې د کبانو روزنې ډېر شمېر فارمونه جوړ شوي دي.
د کرنې وزارت د بڼوالۍ اومالدارۍ ملي برنامه «NHLP» ددې ولایت د کبانو روزنې د فارم لرونکو د ملاتړ په پار پر یوشمېر فارم لرونکو د کبانو بچې وېشلي دي. د خوست دکرنې ریاست چارواکي وایي، چې د کرنې وزارت د بڼوالۍ او مالدارۍ ملي برنامې له خوا ددې ولایت پر ۵۰ فارم لرونکو د کبانو ۴۰ زره بچي وېشل شوي دي.
د خوست د کرنې، ابولګولو او مالدارۍ ریاست چارواکي وایي، چې په ۱۳۹۸ یم کال کې په دې ولایت کې د کبانو روزنې د فارمونو د پراختیا په پار یوشمېر پروژې په پام کې نویل شوي دي، چې په دغو پروژو کې پر فارم لرونکو د کبانو بچي وېشل او د کبانو روزنې نوي فارمونه جوړول شامل دي.
د خوست د کرنې ریاست چارواکي وایي، چې پر فارم لرونکو د کبانو د بچیو په وېش سره په دې ولایت کې د کب روزنې کاروبار غوړیږي او ترڅنګ یې خلکوته دکار روزګار زمینه هم برابروی.
باید وویل شي، چې په افغانستان کې د کب روزنې د فارمونو شمېر دوه زرو ته رسیږي، چې ډېری یې په کندهار، هلمند، ارزګان، ننګرهار، لغمان، بلخ او نیمروز ولایتونوکې شتون لري او له دغو فارمونو څخه په کال کې څه باندې ۱۰ زره ټنه کبان تولیديږي.
