د بلخ کشندې ولسوالی کې پنځه زره څاروي د طاعون ناروغۍ پر ضد وقایوي واکسین شول
۱۸ لړم ۱۴۰۴ هـ.ش
۱۸ جُمَادَى الأول ۱۴۴۷ هـ.ق
د کرنې، اوبولګولو او مالدارۍ ریاست په هڅو او د ملګرو ملتونو د خوړو او کرنې ادارې «اف.اې.او» په مالي ملاتړ، د بلخ ولایت د کشندې ولسوالی کې پنځه زره کوچني څاروي د طاعون ناروغۍ د مخنیوي په موخه وقایوي واکسین شول.
یاد واکسین د مسلکي پاراوټرنرانو په تخنیکي همکارۍ او د بلخ دکرنې ریاست د مالدارۍ آمریت تر مستقیمې څارنې لاندې تطبیق شو. د واکسین کولو موخه د طاعون وژونکې ناروغۍ مخنیوی، د څارویو روغتیا خوندي ساتل، د مالدارانو اقتصادي زیانونه راکمول او د هغوی ملاتړ بلل کېږي.
د بلخ دکرنې ریاست چارواکي وايي، د دې واکسین د تطبیق له امله به د څارویو د شېدو او غوښې تولید عادي پاتې شي، د ناروغیو خپرېدل به په وخت کنټرول شي او مسلکي کسانو ته به د کار زمینه برابره شي.
