د بغلان ولایت د ځمکې د غصب مخنیوی کمېسیون مشر او غړو د یاد ولایت له امنیې قومندان سره وکتل
۷ مرغومې ۱۴۰۱ه.ش
۴ جُمادیَ الثّاني ۱۴۴۴ ه.ق
د بغلان ولایت د ځمکې غصب مخنیوی او د غصب شویو ځمکو د بېرته راګرځولو تخنیکي کمېټې رییس قاري محراب الدین بلال او غړو یې د یاد ولایت له امنیې قومندان الحاج جان محمد حمزه سره وکتل.
په دې کتنه کې د کمېټې غړو د خپلو فعالیتونو په هکله امنیه قومندان ته معلومات وړاندې کړل او ویې ویل، چې سلګونه جریبه ځمکه مو له غاصبینو بېرته راګرځولي دي او د زرګونه جریبه نورو ځمکو د غصب مخه مو نیولي ده او دا لړۍ ادامه لري.
همدارنګه د کمیټې غړو د نظامي ځواکونو د اړتیاوو په وخت کې د ښاغلي حمزه صاحب د لا زیاتې پاملرنې او همکارۍ غوښتنه وکړه.
د بغلان امنیه قومندان الحاج جان محمد حمزه د یاد ولایت د ځمکې غصب مخنیوی او د غصب شویو ځمکو د بېرته راګرځولو تخنیکي کمېټې رییس او غړوته ډاډ ورکړ، چې د دوی اړتیاوو ته به په پوره ډول رسېدنه کوي.
