د باغ داود سيمې د کورونو د سروې چارې پیل شوې
۸ لېندۍ ۱۴۰۳ه.ش
۲۶ جُمَادَى الأول ۱۴۴۶ه.ق
د کرنې، اوبولګولو او مالدارۍ وزارت د اراضۍ ادارې د غیر رسمي ښاري سيمو د ثبت رياست مسوولينو او کارکوونکو لخوا د کابل ولايت په پنځمه حوزه او پغمان ولسوالی کې پرته د باغ داود سيمې د کورونو د سروې چارې پیل شوې.
یاده سیمه چې د عدليې وزارت د ځمکو له غصب څخه د مخنیوي او د غصب شویو ځمکو د استرداد کمېسیون لخوا استرداد شوې له سروې او بررسۍ څخه وروسته دغه کورونه مستحقو کسانو ته د اراضۍ لوی رياست له خوا په اجاره ورکول کېږي.
د کرنې وزارت د اراضۍ ادارې د غیر رسمي ښاري سيمو د ثبت رییس مولوي عبدالصمد پاڅون د يادې پروسې په اړه داسې وویل: «د باغ داود سيمه چې يو برخه يې د کابل ښار پنځمې حوزې پورې او بله برخه يې د کابل ولايت پغمان ولسوالی پورې مربوط ده ددغه رياست د کارمندانو لخواه يې د سروې چارې پیل شوې چې وروسته به ټولې ځمکې او کورونه مستحقو کسانو ته په اجاره ورکړ شي.»
ښاغلي پاڅون زیاته کړه د دغه پروسې له پیلېدو څخه مخکې د يادې سيمې له مشرانو، سپين ګيرو او علماوو سره مو خبرې کړي، چې ټولو د دغه پروګرام درناوي کړې او دغه کار يې د هېواد په کچه د شخصي او امارتي ځمکو د تفکيک او همدارنګه د بیت المال د خونديتوب په برخه کې لوی ګام وباله.
د يادونې ده، چې د کورونو د سروې پروسه د کابل ولايت بګرامۍ ولسوالی، نادرخان تپه، ملا تره خېل ښارګوټي او داسې نورو سيمو کې په بشپړه توګه سرته رسېدلې ده.
