دکرنې وزارت مسلکي مرستيال د اسپارک نړيوالې مؤسسې له رييس سره وکتل
۸ چنګاښ ۱۴۰۱ ه.ش
۳۰ ذوالقعده ۱۴۴۳ ه.ق
دکرنې، اوبولګولو او مالدارۍ وزارت مسلکي مرستيال مولوی صدراعظم، د خپل کار په دفتر کې د SPARK نړيوالې مؤسسې رييس يانيک ډوپونټ سره په کتنه کې د کرنيزو فعاليتونو پر پرمختګ خبرې وکړې.
په دې کتنه کې ښاغلی صدر اعظم په افغانستان کې د پانګونې په غورو زمينو خبرې وکړې او ويې ويل، چې دکرنې وزارت، د کرنې او مالدارۍ په برخه کې د پانګونې په پار پانګوالو ته هر اړخيزې اسانتياوې برابروي ترڅو پانګوال په ډاډه زړه پانګونه وکړي.
دغه راز د يادې مؤسسې ريیس د اسپارک مؤسسې د فعاليتونو په هکله خبرې وکړې او ويې ويل":د سپارک مؤسسه اوسمهال د منځنۍ اسيا په ۱۵ هېوادونو کې فعاليت کوي. په دې وروستيو کې مو پرېکړه وکړه، چې په افغانستان کې هم خپل فغاليتونه پيل کړو، د افغانستان د اوسني حالت د ارزونې په پار، زموږ بهرني پلاوی افغانستان ته راغلي و. ياد پلاوی ددې سفر په ترڅ کې د بېلابېلو دولتي ادارو، د کورنيو او بهرنيو مؤسسو او خصوصي سکټور له استازو سره غونډې درلودې، اوس راغلي يو چې له نږډې خبرې وکړو او خپل کار پيل کړو".
