دکرنې وزارت او آغاخان بنسټ تر منځ د هر اړخيزو همکاريو ژمنه
۲/صفر/۱۴۴۳هـ.ق
۱۸/وږی/۱۴۰۰هـ.ش
د ا.ا.ا د کرنې، اوبولګولو او مالدارۍ وزارت او آغاخان بنسټ د استازو ترمنځ د يوې غونډې په ترڅ کې د دواړو خواوو ترمنځ د هر اړخيزو همکاريو ژمنه وشوه.
غونډه د قرآن مجيد د څو مبارکو آيتونو په تلاوت سره پيل شوه.
په دې غونډه کې د ا.ا.ا د کرنې، مالدارۍ، عشر او زکاة دکمېسیون مشر یا دکرنې وزارت وزیر الحاج مولوي عبدالرحمن راشد، دکرنې وزارت مرستیال مولوي فضل ربي فضلي او د آغاخان بنسټ د فرهنګي برخې مسؤول امان الله ګډون درلود چې، په ترڅ کې يې د دواړو خواوو تر منځ د هر اړخیزو همکاریو ژمنه وشوه.
په غونډه کې د ا.ا.ا د کرنې وزير او مرستيال د آغاخان بنسټ د ټولو برخو د فعاليت په اړه د ياد بنسټ استازو ته پوره ډاډ ورکړ او تر څنګ یې د پوره امنیت ورکولو ژمنه هم وکړه.
په همدې حال کې د آغاخان بنسټ فرهنګي مسؤول وويل، چې نوموړی بنسټ په بېلابېلو برخو لکه( روغتیا، فرهنګ،کرنه، مخابرات، ښوونه او روزنه.....) کې فعالیت لري.
په غونډه کې د آغاخان بنسټ فرهنګي استازی د کرنې په برخه کې د پوره همکاریو ژمنه وکړه، او زياته يې کړه، چې "موږ به په ټول توان سره د کرنې په برخه کې ګړندۍ هڅې کوو په ځانګړي ډول کوم تاریخي بڼونه لکه دچهلستون باغ او دې ورته نور بڼونه چې په تېر کې ویجاړې شوې وو بېرته يې رغوو."
دوی دغه راز وويل، چې د هېواد د لاسمسورتيا او زرغونتيا په پار د کرنې وزارت سره په همغږۍ او همکارۍ هلې ځلې ګړندۍ کوي.
ياده غونډه د قرآن کريم د څومبارکو آيتونو په تلاوت او دعا سره پای ته ورسېده.
