دکرنې سرپرست وزیر د حبیب حسام د چرګانو پالنې شرکت څخه لیدنه وکړه
۳۰ لړم ۱۴۰۰
دکرنې، اوبولګولو او مالدارۍ سرپرست وزیر مولوی عبدالرحمن راشد او د یاد وزارت د اوبولګولو او طبیعي سرچینو مرستیال مولوی شمس الدین شریعتي ننګرهار ولایت ته د سفر په ترڅ کې د حبیب حسام د چرګانو دانې د تولید لړۍ او د چرګانو پالنې فارم څخه لیدنه وکړه.
د کرنې وزارت چارواکو د یاد فارم له چارواکو سره د چرګانو غوښې، دانې او هګیو تولید په برخه کې د افغانستان د ځان بسیانې په لور د تګ په پار مفصلې خبرې وکړې.
د یاد شرکت چارواکو د کرنې سرپرست وزیر او ورسره مل پلاوي ته وویل، چې یاد فارم د ورځې ۱۳۰ زره هګۍ او د چرګانو پنځه زره بوجۍ دانې تولیدوی او داسې زمینو برابرولو ته اړتیا لري، چې حکومت یې د تامینولو په صورت کې کولی شي، چې ځان بسیاینې ته د افغانستان د رسېدو د زمینې برابرولو په برخه کې اغېزمنې کړنې ترسره کړي.
د حبیب حسام شرکت په هېواد کې د هګیو، چرګوړو او چرګانو دانې ستر تولیدوونکی شرکت دی، چې د ننګرهار په ولایت کې موقعیت لري.
