۲تله ۱۳۹۹

دکرنې، اوبولګولو او مالدارۍ وزارت سرپرست او نوماند وزير ډاکټر انوارالحق احدي، نن دخپل کار په دفتر کې دلغمان والي رحمت الله يارمل سره وکتل.

په دې ليدنه کې د لغمان والي د کرنې وزارت سرپرست او نوماند وزير ته د کرنې د سرپرست وزير په توګه دده د نوي دندې مبارکي وويل او ښاغلی احدي ته په دې وزارت کې په چارو کې د لا بريا هيله وکړه.

رحمت الله يارمل دغه راز وويل، چې لغمان د ښو کرنيزو ولايتونو له ډلې څخه ده، چې په کې دکرنې په برخه کې پانکونې او لا ډېرو کرنيزو پروژو پلي کېدو ته زمينه برابره ده. ښاغلی يارمل د کرنې له سرپرست وزير څخه د لغمان په يوشمېر ولسواليو کې د ترويجي ودانيو، يو ستر څېړنيز فارم جوړولو او دغه راز ددې ولايت په يوشمېر سيمو کې د اوبولګولو د لويو پروژو د پلي کېدو په برخه کې د همکارۍ غوښتنه وکړه.

په همدې حال کې، د کرنې سرپرست او نوماند وزير ډاکټر انوارالحق احدي وويل، ددې لپاره چې لغمان د کرنې سکټور د پراختيا لپاره فوق العاده فرصت لري، بوديجوي امکاناتو ته په کتو هلې ځلې کوي، چې په راتلونکو کلونو کې ددې ولايت دکرنې په بېلابېلو برخو کې خپلې برنامې پلي کړي.