دهلمند ولایت دوو ولسوالیو کې ١٠٠ تنو بڼوالو ته روزنه ورکړل شوه
۸ چنګاښ ۱۴۰۴ ه.ش
۳ مُحَرَّمُ الحَرام ۱۴۴۷ه.ق
دهلمند ولایت د کرنې، اوبو لګولو او مالدارۍ ریاست په هڅو او د سولې بنسټ موسسې په مالي همکارۍ، د موسیقلعه او سنګین ولسوالیو کې ۱۰۰ تنو بڼوالو ته مسلکي روزنه ورکړل شوه.
دیاد پروګرام په لړ کې په موسیقلعه ولسوالی کې ۵۰ تنو بزګرو ته د انګورو د حاصلاتو راټولولو، تر راټولولو وروسته تنظیم، او د اوبو مؤثر مدیریت او استعمال اړوند عملي تریننګ ورکړل شو. په یاد تریننګ کې د موسیقلعه د کرنې مسوول حاجي قاري حنیفي او اړونده مسوولینو هم حضور درلود.
همداراز، په سنګین ولسوالی کې هم ورته روزنه د سولې بنسټ موسسې له خوا ورکړل شوه. په دې پروګرام کې هم ۵۰ تنو بڼوالو ګډون درلود، چې ورته د انګورو د حاصلاتو راټولولو، تنظیم، بستهبندۍ، او د اوبو مناسب استعمال په برخه کې مفصل معلومات ورکړل شول، چې د سنګین د کرنې مسوول هم د روزنې په جریان کې حاضر و.
یاد پروګرامونه د بزګرانو د عملي ظرفیت لوړولو او د حاصلاتو کیفیت ښه کولو په موخه ترسره شوي دي.
