دترکيې له سفير سره دکرنې وزير کتنه: دکرنې په برخه کې دترکيې دهمکاريو پر څرنګوالي خبرې اترې

۸سلواغه ۱۳۹۹
دکرنې، اوبولګولو او مالدارۍ وزير ډاکټر انوار الحق احدي دخپل کار په دفتر کې، په افغانستان کې دترکيې سفير اوغوزخان ارتغرل سره وکتل. دواړه دافغانستان دکرنې په برخه کې دترکيېې پر کرنيزو همکاريو خبرې وکړې.
دترکيې سفير له افغانستان سره دخپل هېواد دکرنيزو همکاريو اعلان وکړ او وويل، چې دوی پر کرنه تمرکز لري. په افغانستان کې د ترکيې سفير وويل، چې تر دې مخکې دکرنې په برخه کې د دواړو هېواډونو ترمنځ هوکړه ليک شتون درلود او غوښتنه کوو چې يوه کمېټه دې، دا هوکړه ليک څخه بياکتنه وکړي چې د دواړو هېوادونو ترمنځ کرنيزې اړيکې پياوړي شي.
په همدې توګه دکرنې وزير وويل، ښه داده چې د دواړو خواوو اجنډا مشخص او د اغېزمنتوب پر اساس ولاړه وي. ښاغلی احدي وويل، بايد روښانه شي چې له کومه يې پيلوو او خپلې اړيکې چېرته ورسوو. ښاغلی احدي وويل، چې افغانستان د کرنيزو تجهيزاتو، ماشين الاتو او دکرنې عصري کولو په برخه کې دترکيې همکاريو ته اړتيا لري.
دغه راز دبورسيو وړاندې کول او دکارکوونکو وړتياوې لوړول دترکيې له سفير سره په دې ليدنه کې دکرنې وزير نورې غوښتنې وې.
دکرنې وزير وويل، چې دکرنې وزارت تمرکز پر بڼوالۍ ده او موږ په دې برخه کې دترکيې دهمکاريو غوښتونکي يو.
وروسته دترکيې سفير وويل، چې دافغانستان توليدات ښه کيفيت لري، خو په دې برخه کې دوې ستونزې شتون لري، چې يو يې بسته بندۍ او بل يې اسټانډارډ کول دی. دترکيې سفير ژمنه وکړه، چې دکرنيزومحصولاتو دکيفيت معلومولو ديو لابراټوار په تجهيز کې افغانستان سره مرسته کوي.