خوست کې ۶۰ بېوزله کورنیو ته د چرګانو کورني فارمونه جوړېږي
د کرنې، اوبولګولو او مالدارۍ وزارت په هېواد کې د چرګانو روزنې سکټور د ودې او د بېوزله کورنیو د اقتصادي ودې په پار داځل د «اډا» مؤسسې په همکارۍ د خوست ولایت د علیشېر په ولسوالی کې ۶۰ بېوزله کورنیو ته د چرګانو واړه کورني فارمونو جوړولو لړۍ پیل کړی دی.
ددغو فارمونو د جوړولو په موخه د علیشېر ولسوالی د قدامو او هارونخېلو کلیو کې پر ۶۰ کورنیو پر هرې کورنۍ ۶۴۰۰ افغانۍ نغدې پیسې د فارمونو د کوټو جوړولو په موخه وېشل شوي دي.
دخوست د کرنې، اوبولګولو او مالدارۍ رياست وايي، چې د «اډا»مؤسسې همکارۍ د دغو بېوزله کورنیو د اقتصادي پیاوړتیا په پار پر هرې کورنۍ د هګیو چرګان، د چرګانو خوراکي توکي او د چرګانو د روزنې اړوند نور اړین توکي هم وېشل کېږي.
د خوست د کرنې ریاست د چارواکو په خبره ددې مرستې موخه د چرګانو د روزنې صنعت ته پراختیا ورکول او مېرمنو ته په کور د ننه د کار زمینه برابرول او د دوی اقتصادي پیاوړتیا ده.
