تخار کې د مزدشت د زېرمې بڼ د احاطې دېوال ګټې اخیستنې ته وسپارل شوه

۲۴ لیندۍ ۱۳۹۹
د تخار ولایت د کرنې، اوبولګولو او مالدارۍ ریاست ددې ولایت د ورسج ولسوالۍ د مزدشت د زېرمې بڼ د احاطې دېوال رغنیزې چارې بشپړ کړي دي. یاد دېوال، د تخار والي له خوا رسماً ګټې اخیستنې ته وسپارل شوه.
په هغه غونډه کې، چې ددې دېوال د ګټې اخیستنې په موخه جوړه شوې وه، د تخار والي مولوي قرلق او د تخار د سیمه ییزو ادارو چارواکو، د ولایتي شورا او د پراختیایي شورګانو استازو او د تخار ولایت یوشمېر اوسیدونکو شتون درلود.
ددې دېوال رغنیزې چارې، چې دروان کال د زمري میاشتې په پنځمه نېټه د تخار د کرنې ریاست له لوري او د «تخار ګرین» ودانیز شرکت له خوا پیل شوې وه پرون رسماً پای ته ورسېد.
د مزدشت د زېرمې د بڼ پراخوالي ۱۲۹ جریبه ځمکه ده او یاد دېوال د ۴.۵ کیلو مترو په اوږدوالی رغول شوی دی، چې یاد بڼ احاطه کوي.
یاد دېوال دکرنې وزارت له پراختیایي بودیجې څخه د ۲۳میلیونه او ۸۷زره او ۳۲۸ افغانیو په لګښت رغول شوې ده.