بلخ کې ۴۰۰ بزګرانو سره د عضوي سرې مرسته وشوه
۱۴ لړم ۱۴۰۳ه.ش
۲ جُمَادَى الأول ۱۴۴۶ه.ق
په بلخ ولایت کې د (ډبلیو ایچ ایچ) مؤسسې لخوا ۴۰۰ بزګرانو ته د ۶۴ زره کیلو ګرامه عضوي سرې (ملچ) مرسته ووېشل شوه. د وېش بهیر د خدمتونو عمومي مدیر قاري سید محمد سلطاني او د سبزیجاتو مدیر عبدالباري نیازي له خوا له نږدې وڅارل شو.
په دې مرستو کې هر بزګر ته ۱۶۰ کیلو ګرامه عضوي سره ورکړل شوه، چې د کرنې په پروسه کې د خاورې د حاصلخېزۍ او تولیداتو د زیاتوالي لپاره ګټوره ګڼل کېږي. د وېش بهیر د (ډبلیو ایچ ایچ) مؤسسې لخوا د بزګرانو د ملاتړ په موخه په لاره اچول شوی دی، څو بزګران په خپلو کروندو کې غوره او لوړ حاصل ترلاسه کړي.
یاد بهیر د کرنې په برخه کې د دوامداره اقتصادي ودې هڅه ده، چې د عضوي سرې د وېش په مرسته به د کرنیزو ځمکو د خاورې کیفیت ښه کړي.
