بلخ کې د اصلاح شویو تخمونو تولید ۴۰ سلنه زیاته شوې
۱۴ وږی ۱۳۹۸
د کرنې، اوبولګولو او مالدارۍ وزارت مالي او اداري مرستیال عبدالهادي رفیعي بلخ ولایت ته د خپل سفر په ترڅ کې د یوشمېر پروژو د پرانستې او د پلي کولو د بنسټ ډبرې اېښودو ترڅنګ د بلخ په ولایت کې د اصلاح شویو تخمونو د تصدیو له ګدامونو څخه لیدنه وکړه.
د بلخ ولایت د اصلاح شویو تخمونو د تصدیو سږنۍ تولید ۶۱۷ ټنوته رسیږي، چې د تېرکال په پرتله ۴۰ سلنه زیاتوالی ښیي.
دغه راز سږ کال د هېواد په کچه د اصلاح شویو تخمونو د تولید کچه دوه زره او ۸۰۰ ټنو ته رسیږي، چې بې مخینه زیاتوالی ښیي.
په ورته وخت کې د کرنې وزارت مالي او اداري مرستیال بلخ ولایت ته د خپل سفر په ترڅ کې د یوشمېر پروژو د پرانستلو ترڅنګ ددې ولایت د خاصه پز تکثیري فارم د اوبولګولو شبکه هم ګټې اخیستنې ته وسپارل.
