بادغیس کې د کبانو د وضعیت او قدرتي سرچینو د ساتنې په موخه د آبپوده سیمې ارزونه وشوه
۱۹ تله ۱۴۰۵ هـ.ش
۲۸ رَبِیعُ الْثاني ۱۴۴۸ هـ.ق
د بادغیس ولایت د کرنې، اوبو لګولو او مالدارۍ ریاست د مالدارۍ او حیواني روغتیا آمریت د یوه تخنیکي پلاوي له لوري د جوند ولسوالی د آبپوده سیمې څخه لیدنه وشوه او د کبانو وضعیت او د سیمې طبیعي شرایط وارزول شول. د دې لیدنې موخه د کبانو د وضعیت څېړنه، د اوبو د سرچینو د ساتنې په اړه د عامه پوهاوي لوړول او د کبانو د ناقانونه ښکار مخنیوی و.
په دغه پلاوي کې د مالدارۍ او حیواني روغتیا آمر مولوي عبدالولي مسرور، د حیواني روغتیا عمومي مدیر عبدالحلیم حلیمزاد، د مالدارۍ عمومي مدیر عبدالبصیر صمیم، ډاکټر سلیمان علیزاده او د جوند ولسوالۍ د مالدارۍ او حیواني روغتیا مدیر مولوي عبدالمطلب مخلص ګډون درلود.
د لیدنې پر مهال پلاوي د سیمې د کبانو وضعیت او چاپېریالي شرایط له نږدې وڅېړل او د سیمې اوسېدونکو ته یې د کبانو د ارزښت، د اوبو د طبیعي سرچینو د ساتنې او د کبانو د ناقانونه ښکار د مخنیوي په اړه اړینې سپارښتنې وکړې. همدارنګه، د کبانو د نسل د دوام او د طبیعي چاپېریال د خوندیتوب لپاره د خلکو پر همکارۍ او د طبیعي سرچینو پر مسؤلانه کارونې ټینګار وشو.
د بادغیس د کرنې ریاست اړوند مسؤلین وایي، د قدرتي سرچینو ساتنه او د کبانو د ژوندانه د چاپېریال خوندیتوب د اوبو د ایکوسیستم د توازن او د ژوندیو موجوداتو د نسل د دوام لپاره مهم دي؛ له همدې امله، د داسې سیمو څارنه او د خلکو پوهاوی د طبیعي شتمنیو په ساتنه کې مهم رول لري.
د جوند ولسوالی د آبپوده سیمه د بادغیس ولایت له تاریخي، سیاحتي او طبیعي ښکلاوو برخمنو سیمو څخه ده، چې د عالمتاب په حوزه کې د جوند ولسوالۍ له مرکز څخه شاوخوا ۱۴ کیلومتره واټن لري. د دې سیمې د طبیعي سرچینو ساتنه، د کبانو د ناقانونه ښکار مخنیوی او د اوبو د سرچینو خوندي ساتل د سیمې د چاپېریالي ارزښتونو د دوام او د طبیعي ژوند د خوندیتوب لپاره ځانګړی اهمیت لري.
