اروزګان کې په شنوخونو کې د کرکیلي په پار یوشمېر بزګران وروزل شول
۱۴ کب ۱۴۰۱ه.ش
۱۲ شَعبان المُعَظّم ۱۴۴۴ ه.ق
د اروزګان دکرنې، اوبولګولو او مالدارۍ ریاست وایي، چې ددې ریاست اړوند د سبو او نباتاتو ساتنې تخنیکي او مسلکي ټیم ددې ولایت د مرکز ترینکوټ په سرشخلي سیمه کې کروندګرو ته په شنوخونو او پلاستیکي سبو او نباتاتو دکرکیلي، ناروغیو کنټرول او پالنې په هکله روزنه ورکړی دی.
ددې روزنیز پروګرام موخه د بزګرانو روزل او په ټولو وختونو کې تازه سبو او ترکاریو ته دخلکو لاس رسی دی.
له دې برنامې څخه برخمن شوي بزګران خوښ، چې دوی داسې روزنیزې برنامې په لاره اچول کېږي دوی وویل: «داسې روزنیزې برنامې بزګرانو ته ډېر ګټور تمامېږي او د دوی د حاصلاتو په زیاتوالی او عوایدو په لوړولو کې ډېر زیات رول لري.»
د اروزګان دکرنې ریاست هلې ځلې کوي، چې د دې ولایت د بزګرانو او مالدارانو د پوهې کچه لوړ او د دوی د حاصلاتو او عوایدو زیاتولو ته زمینه برابره کړي.
