ارزګان کې د نیالګیو اېښودو کمپاین پیل شو

۲۸ سلواغه ۱۳۹۸
د ارزګان د کرنې، اوبولګولو او مالدارۍ ریاست وایي، چې په دې ولایت کې د نیالګیواېښودو کمپاین پیل شوی دی، چې په ترڅ کې به یې ددې ولایت په بېلابېلو سیمو کې سل ګونه زره مثمر او غیر مثمر نیالګي کېښودل شي.
د چارواکو په خبره له دې ډلې ډېر شمېر نیالګي یې د ارزګان د کرنې، اوبولګولو او مالدارۍ ریاست په قوریو کې تولید شوي، چې د طرزالعمل او لایحې مطابق به یې دولتي ځایونو، عامه المنفعه سیمو، ښوونځیو او مدرسو ته د قید او جمع نه وروسته د ګډ پلاوي په شتون کې ووېشل شي.
د ارزګان د کرنې ریاست چارواکي ډاډ څرګند کړ چې د نیالګیو تر وېشلو وروسته د ساتنې په موخه د ولایت مقام په مشرۍ د چاپېریال ساتنې او شاروالۍ ادارو سره په ګډه ځانګړی میکانیزم جوړوي ترڅو په سمه توګه د نیالګیو ساتنه وشي.
په ورته وخت کې د ارزګان د کرنې ریاست له خوا سږ کال په دې ولایت کې د مېوې نږدې زر جریبه بڼونه هم جوړیږي.
د ارزګان د کرنې ریاست وایي، چې سږ کال به په دې ولایت کې د بېلابېلو مېوو ۷۵۰ تر زر جریبه نوي بڼونه جوړ شي.
د ارزګان د کرنې ریاست د چارواکو په خبره د مېوو نوي بڼونه جوړول په دې ولایت کې د بڼوالۍ په برخه کې لوی پرمختګ دی.
د کرنې وزارت هلې ځلې کوي، چې ارزګان ولایت کې بڼوالۍ ته وده ورکړي، هغه ونې ترویج کړي، چې په لنډه موده کې مېوه نیسي او ښه کمیت او کیفیت لرونکي وي، تر څو د بڼوالۍ محصولات ډېر او د بڼوالو عواید زیات شي.
د کرنې وزارت له خوا د نوي بڼونو جوړول، د زړو بڼونو بیارغول او پر بڼوالو د بڼوالۍ اړونده توکي وېشل د بڼوالۍ د سکټور د پیاوړتیا او د نوي بڼونو د پېژندنې لامل شوي دي او له دې لارې بزګرانو ته د کار زمینه هم برابره شوې ده.