د بامیان پر بزګرانو د پور ورکولو پروګرام پیل شو
۵ زمری ۱۳۹۸
د کرنې، اوبولګولو او مالدارۍ وزیر نصیر احمد درانی په شتون کې د بامیانو په ولایت کې د تولید د ودې او معیاري کولو په پار پر بزګرانو د پور ورکولو پروګرام پیل شو. ددې پروګرام په اډانه کې د کرنې د پراختیا صندوق له لارې د بامیانو بزګرانو ته ۱۸۰ میلیونه افغانۍ پور ورکول کیږي.
ددې برنامې په پرانیستغونډه کې، چې د بامیانو ولایت د دکاني درې په سیمه کې په لاره اچول شوې وه د کوپراټیفونو چارواکي او د بامیانو لایت د مرکز او ولسوالیو مشران شتون درلود.
د کرنې وزیر نصیر احمد درانی یادې برنامې ته په ویناکې وویل، چې د دوی موخه د تولید وده او معیاري کول او په ټوله کې د بزګرانو اقتصادي وده او پرمختیا ده تر څو د دوی په دسترخوان کې مثبت بدلون رامنځته شي.
دغه راز د بامیانو پر بزګرانو د پور ورکولو د برنامې په پرانیستغونډه کې د بامیانو والي محمدطاهر زهیر وویل، چې دا چاره د تولید د زیاتوالي او معیاري کولو له لارې د بزګرانو داقتصادي ودې په پار د ارزښت وړ ګام دی.
په همدې حال کې د بزګرانو په استازيتوب سیدعباس جعفري خبرې وکړې. هغه بزګرانو ته د ښه او غوره چوپړونو د وړاندې کولو په پار له نصیراحمد درانی څخه د مننې ترڅنګ وویل، دغه پورونه کولای شي، چې د بزګرانو د کاروبار د ودې په برخه کې مرسته وکړي او په دې برخه کې اغېزه ولري.
