د ننګرهار دکرنې رياست مرستيال: دڅارويو دناروغيو تشخيصي لابراتوار سره هر اړخيزې همکارۍ کوو
۸/صفر المظفر/۱۴۴۳هـ.ق
۲۵/وږی/۱۴۰۰هـ.ش
د ننګرهار د کرنې، اوبولګولو او مالدارۍ ریاست د ختیځ زون په کچه د څارويو د ناروغيو مجهز او په عصري وسایلو سمبال لابراتوار لري، چې هره ورځ په لسګونه مالداران د خپلو مالونو د ناروغيو نمونې یاد لابراټوار ته د درملنې په موخه راوړي.
د ا.ا.ا د ننګرهار د کرنې، اوبولګولو او مالدارۍ ریاست مرستیال قاري فضل الرحمن صادق، چې د څارویو د روغتیا امر ډاکتر ضمیر بهسودي یې ملتیا کوله د څارویو د ناروغيو د تشخیص مرکز څخه لیدنه وکړه. او مسؤولينو ته یې لازمې سپارښتني وکړې.
د ننګرهار د کرنې ریاست مرستیال قاري صادق د ياد لابراټوار مسؤولينو ته د هر راز همکاريو ډاډ ورکړه.
د ياد لابراټوار مسؤولينو د کرنې ریاست مرستیال څخه دمننې ترڅنګ د يوشمېر توکو له ډلې "د ایلیزا ماشین د کېټونو یا بستو، لابراټواري معایناتو ځینو وسایلو او امکاناتو برابرولو غوښتنه وکړه."
د ننګرهار د څارویو د ناروغيو د تشخیص په مرکز کې هره ورځ په لسګونه پرازیټي، بکتریایې، وایروسي او نورو اړونده ناروغيو نمونې تشخیص اومالدارانو ته لازمي سپارښتنې کېږي.
