دکرنې وزیر د ملګرو ملتونو د خوړو سیسټمونو غونډه کې خبرې وکړې

mail-admin
چهارشنبه ۱۴۰۰/۵/۶ - ۱۵:۲۱
دکرنې وزیر د ملګرو ملتونو د خوړو سیسټمونو غونډه کې خبرې وکړې

۶ زمری ۱۴۰۰
دکرنې، اوبولګولو او مالدارۍ وزیر، د ملګرو ملتونو د خوړو سیسټمونو په پای غونډه کې په افغانستان کې د خوړو خوندیتوب او د کرنې پر عصري کولو خبرې وکړې.
دا غونډه، د افغانستان په ګډون د ۱۱۱ هېوادونو د کرنې وزیرانو او یوشمېر رهبرانو په ګډون په لاره اچول شوې وه.
د کرنې وزیر ډاکټر انوارالحق احدي په دې غونډه کې وویل، چې د کرنې دودیز سیسټم او نه اصلاح شویو تخمو څخه د استفادې له وجې د ګاونډو هېوادونو په پرتله په افغانستان کې له کرنیزو ځمکو څخه د حاصل تر لاسه کولو کچه ډېره ټیټه ده. هغه وویل، چې په افغانستان کې مخکې له هر هکټاره ځمکې څخه ۲.۵ مټریک ټنه او اوس ۲.۷ مټریک ټنه غنم راټولېږي، په داسې حال کې، چې ګاونډیو هېوادونو له همدې اندازې ځمکې څخه ۳.۵ تر ۴ مټریک ټنه غنم راټولوي.
ښاغلی احدي زیاته کړه، څلور لسیزه جګړه ددې لامل شوې، چې افغانستان ونه کولی شي د کرنیزو محصولاتو په تولید کې ځان بسیاینې ته ورسېږي.
هغه وویل، چې په ۱۹۷۰ لسیزه کې د خوراکي توکو په تولید کې افغانستان پرځان بسیا وه، خو اوس ۲۵تر۳۰ سلنه یاد مواد واردوي.
بلخوا ښاغلی احدي وویل، چې د کرنې وزارت له خصوصي سکټور سره د سړوخونو په جوړولو کې همکاري کړی دی، چې دا چاره د محصولاتو د زېرمه کولو د وړتیالوړنې، کارموندنه او د بېوزلۍ کچې د ټیټولو لامل شوی دی.
هغه د خوړو او درملو ملي ادارې جوړولو ته په اشارې سره وویل، چې مخکې د خوړو او درملیزو محصولاتو اسټنډرډ کول بېلابېلو بنسټونو پورې تړې وه، چې دا چاره ډېرې ستونزې رامنځه کړي و، خو اوس ددې ادارې په جوړېدو سره په دې برخه کې ستونزې هوارې شوي دي.
دکرنې وزیر د خوړو خوندیتوب په اړه وویل، چې خلک باید ارزان او اسانه خوړو ته لاس رسي ولري، چې په بېوزلو هېوادونو کې دا چاره نړیوالې همکارۍ ته اړتیا لري. هغه په دې برخه کې پر ملي او نړیوال مشارکت ټینګار وکړ.
دکرنې وزیر دغه راز وویل، چې ا فغانستان خوړو ته لاس رسی او د خوړو خوندیتوب په برخه کې نړیوال اسټنډرډونه مراعت کړي دي او ډېر ژر به خپل د خوړو سیسټم اسټراټژۍ اعلان کړي.
هغه له ملګرو ملتونو، د دوی موسسې، له ټولو پرمختیایي همکارانو، څېړنیزو موسسو او پوهنتونونو او نړیوالې ټولنې څخه وغوښتل، چې له افغانستان سره دې خپل مالي او تخنیکي ملاتړ ته دوام ورکړي، ترڅو راتلونکې ۱۰ کلن ليدلوری ترسیم او اسټنډرډ خواړه تأمین شي.

تازه ترین اخبار

سه‌شنبه ۱۴۰۴/۷/۱۵ - ۱۳:۲۳
Background image

کابل کې د کرنیزو او مالدارۍ محصولاتو درې دېرشم نندارتون بریالۍ ترسره شوه 

۱۵ تله ۱۴۰۴ هـ.ش
۱۴ رَبِیعُ الْثاني ۱۴۴۷ هـ.ق
د کرنې، اوبولګولو او مالدارۍ وزارت له خوا د کرنیزو او مالدارۍ محصولاتو درې دېرشم نندارتون د ۱۴۰۴ هـ.ل کال د تلې له ۹ تر ۱۲مې نېټې پورې، د. . .

سه‌شنبه ۱۴۰۴/۷/۱۵ - ۸:۵۰
Background image

ننګرهار کې پر لسګونو کورنیو د شېدو راټولولو توکي ووېشل شول

۱۴ تله ۱۴۰۴ هـ.ش
۱۳ رَبِیعُ الْثاني ۱۴۴۷ هـ.ق
د ننګرهار دکرنې، اوبو لګولو او مالدارۍ ریاست په هڅو د ډاکار خیریه مؤسسې له لورې ۱۵۰ کورنیو ته د یو میلیون او ۱۲۲ زره افغانیو په لګښت د شېدو. . .

دوشنبه ۱۴۰۴/۷/۱۴ - ۱۴:۲۹
Background image

پنجشېر کې د لوبیا حاصلات زیات شوي 

۱۴ تله ۱۴۰۴ هـ.ش
۱۳ رَبِیعُ الْثاني ۱۴۴۷ هـ.ق
د پنجشېر د کرنې، اوبو لګولو او مالدارۍ ریاست اعلان کړی، چې په روان کال کې د دې ولایت د لوبیا حاصلات د تېر کال په پرتله پنځه سلنه زیات شوي. . .

بازگشت