سږکال څه باندې ۱۴ زره ټنه اصلاح شوي تخمونه پر بزګرانو وېشل کیږي
![امسال بیش از چهاردههزار تُن تخم اصلاحشده به دهقانان توزیع میشود](https://www.mail.gov.af/sites/default/files/2020-09/119896765_3636858973005343_6261823740956122831_o.jpg)
۲۹ وږی ۱۳۹۹
دکرنې، اوبولګولو او مالدارۍ وزارت سرپرست او نوماند وزیر ډاکټر انوارالحق احدي، نن دخپل کار په دفتر کې د بذري تخمونو د شرکتونو د ملي ټولنې له چارواکو سره وکتل او وویل ټاکل شوې، چې د دغو شرکتونو له لارې د روان کال د مني موسم د کرکېلي پر وخت پر بزګرانو د وېش په پار څه باندې ۱۴ زره مټریک ټنه اصلاح شوي تخمونه چمتو شي.
د کرنې وزارت چارسمبال زیاته کړه، سږکال باید د مني موسم د کرکېلي د موسم تر رارسېدو مخکي اصلاح شوي تخمونه د بزګرانو په واک کې ورکړل شي، ترڅو راتلونکی کال د محصولاتو زیاتوالی ته زمینه برابره شي. د کرنې وزارت نوماند وزیر وویل: «د اصلاح شويو تخمونو شرکتونه درې میاشتې فرصت دلود، ترڅو تدارکاتي چارې بشپړ کړي، خو له بده مرغه تر دې دمه دغه لړۍ ډېر ورو پرمخ تللی دی. سږکال موږ د کرکېلي تر وخت مخکې په مناسبه بیه باکیفیته اصلاح شوي تخم غواړو.»
ټاکل شوې، چې د نړیوال بانک د مرستو له لارې د کرنې د ودې او د خوړوخوندیتوب بېړنۍ پرژې له خوا څه باندې ۱۴ زره مټریک ټنه اصلاح شوي تخمونه و پېرل شي او پر بزګرانو ووېشل شي.
په همدې حال کې، د بذري تخمونو د شرکتونو د ملي ټولنې مشر سیدعبدالقادر سادات، یاد سکټور ته د ځانکړې پاملرنې په پار له انوارالحق احدي څخه مننه او د کرنې وزارت سره یې د لازیاتو همکاریو ژمنه وکړه. ښاغلی سادات وویل، ددې لپاره چې دکرنې وزارت سرپرست د خپل کار د پیل په لومړنیو ورځو کې اصلاح شویو تخمونو ته پاملرنه وکړه، دا د تولید زیاتوالي لپاره زمینه برابروي او ښه راتلونکی لري.