۲ وږی ۱۳۹۹

د بامیانو دکرنې، اوبولګولو او مالدارۍ ریاست ددې ولایت د مڼو د ۳۳ سلنې زیاتوالي خبر ورکوي او وایي، چې د بامیانو د مڼو د حاصلاتو سږنۍ کچه به نږدې ۳۰ زره ټنو ته ورسېږي.

د بامیانو د کرنې رییس عبدالوهاب محمدي وایي، چې تېرکال ددې ولایت د مڼو حاصلات ۲۰ زره ټنه وه، خو سږکال ددې اټکل شته چې دتېرکال په پرتله لس زره مټریک ټنه زیات حاصل لاسته راشي.

د بامیانو دکرنې رییس زیاته کړه، په دې وروستیو کلونو کې، چې د کرنې وزارت له خوا په بامیان ولایت کې کوم بڼونه جوړ شوي دي، ډېری یې د مڼو بڼونه دي، چې یوشمېر یې نوي حاصل ته رسېدلي دي. د هغه په خبره ددې ولایت د مڼو د حاصلاتو د زیاتوالي اصلي لامل حاصل ته د همدغو نویو بڼونو رسېدل دي.

په همدې حال کې د بامیان ولایت یوشمېر بڼوال هم د خپلو بڼونو له سږنۍ حاصلاتو خوښ دي او وایي، کوم بڼونه چې دکرنې وزارت له خوا جوړې شوي دي، لږ او ډېر ثمر ته رسېدلي دي. دغه بڼوال هیله من دي، چې راتلونکې کلونو کې تر دې هم ډېر حاصل تر لاسه کړي.

د بامیان ولایت د مرکز اړوند فطمستي کې یو تن بڼوال باقر وایي: «پنځه کاله مخکې دکرنې وزارت له خوا راته په یوه جریبه ځمکه کې د مڼو نیالګي کېښودل شول او درې کاله کیږي، چې ورڅخه حاصل اخلم او کال په کال یې حاصلات هم ډېریږي.» د بامیان ولایت د مرکز اړوند د میرهاشم کلي یوتن بڼوال ستار وایي: «د کرنې له وزارت څخه غواړم، چې تر دې وروسته هم د ونو د ښاخونو پرېکولو او د ونو د درمل شېندلو په برخه کې له موږ سره مرسته وکړي ترڅو وکولای شو، چې له خپلو بڼونو زیات حاصل راټول کړو.»

د وروستیو څلورو کلونو په لړ کې د کرنې وزارت له لارې د همکارو پروژو په همکارۍ د بامیان په ولایت کې د مېوو شپږ زره نوي بڼونه جوړ شوي دي. په ټوله کې په دغو بڼونو کې ۱۸ ډوله مېوې دود شوي دي، چې ډېری یې د مڼو بڼونه دي.