غزني کې پر درې زره او ۶۱۴ بزګرانو د کرنې اړونده توکي او درمل ووېشل شول
۸ چنګاښ ۱۳۹۹
د غزني د کرنې، اوبولګولو او مالدارۍ ریاست د بڼوالۍ او مالدارۍ ملي پروژې «NHLP» په همکارۍ ددې ولایت پر درې زره او ۶۱۴ بزګرانو د کرنې اړونده توکي، درمل او تبلیغاتي کتابونه وېشلي دي.
ددې مرستې په وېش غونډه کې د غزني د کرنې ریاست چارواکي وویل، چې له دغو مرستو برخمن شوي بزګران په خپلو کرنیزو فعالیتونو کې د کرنې ریاست سپارښتنې علمي کړي او نورو بزګرانو سره یې هم شریکې کړي دي؛ ځکه یې ورسره دا مرستې وکړې.
په وېشل شویو توکو کې د ونو د ښاخونو د پرېکولو اره، زینه، د درملو شېندلو لوی او کوچني پمپونه، محافظتي جامې او نور اړین توکي شامل دي. ددې ترڅنګ د یادو بزګرانو د وړتیا لوړلو په پار پر دوی د کرنې اړوند دوه زره او ۴۵۰ توکه کتابونه، چارتونه او بروشورونه وېشل شوي دي. دغه راز د یادو بزګرانو د کروندو دخوندي کولو په پار ۳۰۰ یو لیټره کرنیز درمل هم پر دوی ووېشل شول.
ددغو مرستو د وېش موخه د بڼوالو او بزګرانو ملاتړ او په دې ولایت کې د کرنې او بڼوالۍ د محصولاتو معیاري کول دي.
له دغو توکو څخه برخمن شوي بزګران د کرنې وزارت له هلوځلو څخه د منني ترڅنګ ژمنه وکړه، چې د کرنې او بڼوالۍ د حاصلاتو د زیاتوالي په پار هلې ځلې لا ډېر وي.
