ارزګان کې د شکرپارې ۱۲ هکټاره سوداګریز بڼونه جوړ شول
۲۱ کب ۱۳۹۸
په دې وروستیو کې د ارزګان ولایت د کرنې ریاست د شکرپارې طرحه د جمهوري ریاست له خوا منظور شوې، چې په دې برخه کې هلې ځلې هم په دې ولایت کې ګړندي شوي دي.
د ارزګان د کرنې، اوبولګولو او مالدارۍ ریاست چارواکي وایي، چې ددې طرحې د پلي کېدو په پار د لومړي ځل لپاره په دې ولایت کې د شکرپارې ۱۲ هکټاره سوداګریز ننداریز بڼونه جوړ شوي دي.
د ارزګان د کرنې رییس وویل، چې د ارزګان د کرنې ریاست د شکرپارې طرحه د پنځو کلونو لپاره ده، چې په دې طرحه کې د ارزګان ولایت لپاره ۴۰۰ نوي بڼونه جوړول او د بڼوالۍ اړونده توکو ۱۵ کڅوړې، ۲۰۰ سلفر خونې کلیکسون او د شکرپارې د پروسس او بسته بندی فابریکه شامل دي. د ارزګان د کرنې ریاست وایي، چې ددې طرحې مطابق سږکال ۱۲ هکټاره نوي بڼونه او ۱۵ زاړه بڼونه جوړوي، چې د نویو بڼونو د جوړولو چارې بشپړ شوي دي.
د ارزګان دکرنې ریاست وایي، چې ددې طرحې په پلي کولو سره د ارزګان ولایت د شکرپارې ټول تولیدات په معیاري ډول تولید او بسته بندي کیږي او دغه راز په معیاري او قانوني ډول ملي او نړیوالو مارکېټونو ته صادریږي.
