کندز کې د کرنیزو پراختیايي پروژو د پلي کېدو او پرمختګ په اړه د «ډاکار» دفتر سره مهمه ناسته ترسره شوه
۳۰ وری ۱۴۰۵ه.ش
۲ ذُو ٱلْقَعْدَةِ ۱۴۴۷ه.ق
د کندز دکرنې، اوبولګولو او مالدارۍ رییس مولوی نیاز محمد عابد د «ډاکار» مؤسسې د شمال او شمال ختیځ زون دفتر مسوول داد الله سره په کتنه کې پر کرنیزو پروژو خبرې اترې وکړې.
په کندز ولایت کې د کرنې ریاست او د «ډاکار» دفتر ترمنځ په ترسره شوې لیدنه کې دواړو لورو د یاد ولایت په کچه د پراختیايي پروژو د تطبیق او پرمختګ په اړه هر اړخیز بحث او د نظر تبادله وکړه.
په دې لیدنه کې د هغو مهمو پروژو یادونه وشوه چې د «ډاکار» دفتر له لوري عملي کېږي، چې پکې د چکډېمونو جوړول، د اوبو لګولو کوچنیو بندونو جوړول، د هګۍ اچوونکو چرګانو وېش، د مېوه لرونکو بڼونو رامنځته کول او د سبو او شولو نمایشي قطعې شاملې دي.
د «ډاکار» دفتر مسوول دادالله د دغو پروژو د روان وضعیت په اړه د معلوماتو د وړاندې کولو پر مهال وویل، چې د پروګرامونو یوه د پام وړ برخه لا دمخه تطبیق شوې او پاتې نورې یې اوس هم د پلي کېدو په حال کې دي. هغه زیاته کړه چې یادې پروژې د کرنیز وضعیت په ښه والي، د حاصلاتو په زیاتوالي او د بزګرانو د اقتصادي پیاوړتیا په برخه کې مهم رول لري.
ورپسې، د کندز د کرنې رییس مولوي نیاز محمد عابد د «ډاکار» دفتر له همکاریو او فعالیتونو څخه مننه وکړه او د اړوندو ادارو ترمنځ یې د لا زیاتې همغږۍ پر اړتیا ټینګار وکړ. نوموړي د دغو پروژو پر وخت او باکیفیته تطبیق د کرنې سکټور د ودې او د بزګرانو د هوساینې لپاره مهم وباله او د ورته پروګرامونو د دوام څخه یې بشپړ ملاتړ څرګند کړ.
د کرنې، اوبو لګولو او مالدارۍ وزارت هڅه کوي، چې د نړۍوالو او همکارو بنسټونو په همغږۍ د هېواد په بېلابېلو ولایتونو کې کرنیزې پراختیايي پروژې پلې کړي، څو د بزګرانو اقتصادي وضعیت ښه او د کرنیزو حاصلاتو کچه لوړه شي. کندز ولایت هم د هغو سیمو له ډلې څخه دی، چې په کې د اوبو مدیریت، بڼوالۍ او مالدارۍ برخو ته ځانګړې پاملرنه شوې ده.
