د افغانستان د کرنې او مالدارۍ خونه د خپلو فعالیتونو راپور او راتلونکو پلانونه وړاندې کړل
۴ سلواغه ۱۴۰۴ه.ش
۵ شَعبان المُعَظّم ۱۴۴۷ه.ق
د افغانستان د کرنې او مالدارۍ خونې چارواکو د خپلو فعالیتونو راپور او راتلونکو پلانونه د کرنې، اوبو لګولو او مالدارۍ وزارت د کرنې او مالدارۍ مرستیال مولوي صدر اعظم عثماني ته په یوه خبري ناسته کې وړاندې کړل.
یاده ناسته په کابل کې د رسنیو د مسوولینو او خبریالانو په حضور کې جوړه شوې وه، چې په کې د کرنې او مالدارۍ خونې چارواکو د دې ادارې د لاسته راوړنو او راتلونکو پروګرامونو په اړه د سړوخونو جوړولو، د کرنیزو، بڼوالۍ او مالدارۍ محصولاتو د صادراتو په برخو کې معلومات وړاندې کړل.
د ناستې په پیل کې د افغانستان د کرنې او مالدارۍ خونې رییس خان محمد فروتن د دې خونې د فعالیتونو په اړه خبرې وکړې او ویې ویل، چې دغه خونه د کرنې د ترویج او څېړنو، د لابراتوارونو د جوړولو، د غواوو، پسونو، اوښمارغه او چرګانو د فارمونو د جوړولو، د اقتصادي بوټو د معرفي کولو، د اصلاح شوو تخمونو د ترویج، د بیرې د ونو د ځنګلونو د جوړولو او همدارنګه د کرنیزو او بڼوالۍ محصولاتو د اروپا، روسیې، هندوستان، متحده عربي اماراتو، قطر، سعودي عربستان او ګاونډیو هېوادونو ته د صادرولو په برخه کې مهم فعالیتونه ترسره کړي دي. نوموړي ټینګار وکړ، چې دغه لاسته راوړنې د کرنې وزارت او د کرنې او مالدارۍ خونې د ګډو همکاریو او هڅو پایله ده.
وروسته، د کرنې، اوبو لګولو او مالدارۍ وزارت مرستیال مولوي صدر اعظم عثماني وویل، چې له وروستیو بدلونونو وروسته د بنسټیزو فعالیتونو د پیاوړتیا او د هېواد د ځانبسیاینې پر لور د سوق کولو لپاره پراخې هڅې شوې دي. هغه زیاته کړه، چې پخوا ډېر سکتورونه له رکود سره مخ وو، خو اوس په ځانګړې توګه د چرګانو د روزنې په برخه کې د پام وړ پرمختګونه شوي او د فعالو فارمونو شمېر زیات شوی دی. د هغه په وینا، په هېواد کې ګڼې سړوخونې هم جوړې شوې دي او د افغانستان کرنیز محصولات سیمهییزو او نړۍوالو بازارونو ته صادرېږي.
د کرنې او مالدارۍ مرستیال ټینګار وکړ، چې دا ټول اقدامات د بزګرانو او مالدارانو د ملاتړ او د کورنیو محصولاتو د ښه بازارموندنې د زمینې برابرولو لپاره ترسره کېږي، او دا هڅې به دوام ولري، تر څو بزګرانو ته لا ډېر ارزښتناک او اقتصادي نباتات وروپېژندل شي او د هغوی عواید ډېر شي.
همدارنګه، د افغانستان د کرنې او مالدارۍ خونې مرستیال میرویس حاجيزاده په خپله وینا کې وویل، چې افغانستان له بډایو قدرتي سرچینو څخه برخمن دی او له دې ظرفیتونو څخه د اقتصادي ودې لپاره استفاده کېدای شي. هغه زیاته کړه، چې د کرنې او مالدارۍ خونه ژمنه ده، تر څو بزګران او مالداران د دوامدارو اقتصادي فعالیتونو پر لور وهڅوي.
په پای کې، د افغانستان د کرنیزو او مالدارۍ تولیداتو د خونې اجرائیوي رییس ډاکتر وسیم صافي د روان کال د فعالیتونو او د راتلونکي کال د پلانونو په اړه یو هر اړخیز پریزنټېشن شریک کړ. یاده ناسته د سوداګرو، مالدارانو او بڼوالو د وړاندیزونو او د خیر دعا په ویلو سره پای ته ورسېده.
