بلخ ولایت ته د کرنې وزارت د اراضۍ رییس سفر
۲۴ مرغومې ۱۴۰۴ه.ش
۲۴ رَجَب المُرَجَّب ۱۴۴۷ه.ق
د کرنې، اوبو لګولو او مالدارۍ وزارت د اراضۍ رییس مولوي محمود مظلوم بلخ ولایت ته د سفر په ترڅ کې د بلخ ولایت د کرنې، اوبو لګولو او مالدارۍ رییس حافظ محمد موسی مبین او د یاد ریاست د اراضۍ برخې له کارکوونکو سره کاري ناسته ترسره کړه.
یاده غونډه د قرآن کریم د مبارکو آیتونو په تلاوت پیل شوه. وروسته، د بلخ د کرنې رییس حافظ محمد موسی مبین د ښه راغلاست ترڅنګ د ادارې د روانو فعالیتونو په اړه معلومات وړاندې کړل. په دې ناسته کې د بلخ د کرنې ریاست د اراضۍ د برخې ټول کارکوونکي شتون درلود.
د کرنې وزارت د اراضۍ رییس مولوي محمود مظلوم په خپلو خبرو کې د اسلامي امارت د رهبرۍ د فرمانونو پر تطبیق، د کاري اصولو پر مراعت، له مراجعینو سره پر نېک چلند، په اداري چارو کې د غیر ضروري مداخلو پر مخنیوي او په کاري چاپېریال کې د همکارۍ او ورورولۍ د فضا پر ټینګښت ټینګار وکړ. نوموړي همدارنګه د بلخ د کرنې ریاست له فعالیتونو ستاینه وکړه او د اراضۍ برخه یې د دې ریاست له مهمو برخو څخه وبلله.
نوموړي ټینګار وکړ چې د ځمکو پورې اړوند ټولې چارې باید د اصولو او مقرراتو له مخې ترسره شي او په دې برخه کې هېڅ ډول غیرقانوني اقدام د منلو وړ نه دی. همدارنګه، د ځینو مهمو موضوعاتو لکه د بنسټیزو پروژو لپاره د ځمکو د ځانګړي کولو په اړه هم بحث وشو.
یاده ناسته د تفاهم او همغږۍ په فضا کې په دعاییه سره پای ته ورسېده.
