د میدان وردګو جلریز ولسوالی کې د ۱۳ شنوخونو څارنه وشوه او بزګرانو ته تخنیکي لارښوونې او تخمونه ووېشل شول
۲۴ مرغومې ۱۴۰۴ه.ش
۲۴ رَجَب المُرَجَّب ۱۴۴۷ه.ق
د میدان وردګو ولایت د جلریز ولسوالی په بېلابېلو حوزو کې د «ان.سي.اې» مؤسسې له لوري او د میدان وردګو ولایت د کرنې، اوبو لګولو او مالدارۍ ریاست په همکارۍ د یادې ولسوالی بزګرانو ته شاوخوا دیارلس ۱۳ شنوخونې جوړې شوې وې. د «ان.سي.اې» مؤسسې او د کرنې ریاست د مسؤلو کارمندانو له خوا له یادو شنوخونو څخه څارنه ترسره شوه، چې له مخې یې د کارونو د اساسي او معیاري ترسره کېدو ډاډ ترلاسه شو.
د دې څارنې تر څنګ، د شنوخونو او راټولو شویو لنډو ساحو کروندګرو ته د کرنې ریاست د مسؤلو کارمندانو له خوا د کرنې په برخه کې عملي روزنې او ارشادي زدهکړې ورکړل شوې. په دې روزنه کې بزګرانو ته د بادرنګو، کاهو، کدو او رومي بانجانو د کرلو لارې چارې، د کیمیاوي سرې سم استعمال، د خاورې نرمښت، د رطوبت او تودوخې د کنټرول په اړه مفصل معلومات وړاندې شول.
سربېره پر دې، د شنوخونو هر کروندګر ته یو پاکټ د بادرنګو تخم (چې په هر پاکټ کې ۵۰۰ دانې موجودې وې)، یو پاکټ د رومي بانجانو، یو پاکټ د کدو او یو پاکټ د کاهو تخمونه هم ووېشل شول.
د یادونې وړ ده، چې د جلریز ولسوالی بزګرانو د دې پروګرام هرکلی وکړ، خپله خوښي یې څرګنده کړه او د کرنې ریاست او د «ان.سي.اې» مؤسسې له مسؤلو کارمندانو څخه یې مننه وکړه.
