ننګرهار کې د ښه مدیریت او اداري نظم ورکشاپ ترسره شو
۱۴ مرغومې ۱۴۰۴ه.ش
۱۴ رَجَب المُرَجَّب ۱۴۴۷ه.ق
د کرنې، اوبولګولو او مالدارۍ وزارت د کارکوونکو چارو رییس مولوي محمد عثمان ترابي، چې دیاد ریاست سلاکار محمد حنیف احسان یي ملتیا کوله د ننګرهار ولایت ته د سفر پر مهال د فعالیتونو څارنه او ارزونې ترڅنګ د ښه مدیریت تر عنوان لاندې کارکوونکو ته روزنیز ورکشاپ ترسره کړ.
د کرنې وزارت د کارکوونکو چارو رییس مولوي محمد عثمان ترابي د یاد سفر موخه د اداري فعالیتونو نظارت او ارزونه، د ښه مدیریت د اصولو ترویج او د کارکوونکو د ظرفیت لوړولو په موخه د روزنیز ورکشاپ دایرول یاد کړ.
ښاغلي ترابي د ننګرهار د کرنې ریاست امرینو سره په ناسته کې د ښه مدیریت، ولس ته د شفافو خدماتو د وړاندې کولو، اداري نظم او ډسپلین په اړه هر اړخیزې خبرې وکړې او هغه ټینګار وکړ چې اغېزمن مدیریت د ادارو د پرمختګ او د خلکو د باور د پیاوړتیا بنسټ جوړوي.
دننګرهار د کرنې ریاست د عشر امر مولوی سلیمان اسامه د ښاغلي ترابي په مشرۍ راغلي پلاوي څخه مننه وکړه او زیاته یې کړه، چې داسې پروګرامونه د اداراتو کارکوونکو لپاره خورا مهم دي، چې په اساس به یې په اداره کې د کارکوونکو وړتیا لوړېږي.
همدارنګه د کرنې وزارت د کارکوونکو چارو ریاست د سلاکار محمد حنیف احسان له لوري د ښه مدیریت تر عنوان لاندې مفصل پریزنټېشن وړاندې شو، چې پکې د اداري چارو د سمون، د کاري موثریت لوړولو او د مسلکي چلند پر ارزښتونو رڼا واچول شوه.
