د کرنې وزارت د دعوت او ارشاد رییس د کابل اراضۍ ریاست څخه لیدنه وکړه
د کرنې، اوبولګولو او مالدارۍ وزارت د دعوت او ارشاد رییس مولوي محبالله انعام د کابل د اراضۍ ریاست څخه لیدنه وکړه او کارکوونکو ته یې د اداري اخلاقو د مراعت، د سیرت او صورت د نبوي سنت سره د برابرولو او له مراجعینو سره د نېک چلند په اړه لازمې لارښوونې وکړې.
د دې لیدنې پر مهال، مولوي محبالله انعام د اراضۍ ریاست کارکوونکي د اخلاقي اصولو مراعت، په کاري چاپېریال کې د ښه سلوک، له همکارانو او مراجعینو سره د متقابل احترام او همدارنګه د آمر مافوق د اوامرو د تطبیق په پار وهڅول او ټینګار یې وکړ، چې د سیرت او صورت ترمنځ همغږي د اداري نظم د پیاوړتیا او د خدمتونو د ښه والي په برخه کې مهم رول لري.
همدارنګه، د دې لیدنې په ترڅ کې د کارکوونکو ظاهري وضعیت، د چلند ډول او کاري سلوک وارزول شو او د ښه والي لپاره اړینې سپارښتنې وړاندې شوې.
یاده لیدنه د کرنې وزارت امام مولوي جمعهخان او مولوي شفیقالله په حضور کې ترسره شوه.
