سږ کال په هېواد کې له یو میلیون او ۳۲۲ زره مټریک ټنو څخه ډېر هندواڼې راټولې شوې دي

د کرنې، اوبولګولو او مالدارۍ وزارت د احصائیې او کرنیزو معلوماتو ریاست د شمېرنو له مخې، د روان لمریز کال په ترڅ کې د هېواد په کچه له یو میلیونه او ۳۲۲ زره متریک ټنه څخه ډېر هندواڼې تولید او راټول شوې دي.
د یادو شمېرو پر بنسټ، سږکال په ټول هېواد کې ۷۸ زره او ۸۰۸ هکټاره ځمکه د هندواڼو تر کرکېلي لاندې وه، چې له دغو کروندو څخه په ټولیز ډول ۱٬۳۲۲٬۸۲۷ متریک ټنه حاصل تر لاسه شوی دی.
د فراه، بلخ، هرات او بادغیس ولایتونه د هندواڼې د کر او تولید له پلوه د هېواد له مخکښو سیمو څخه شمېرل کېږي. له انګورو وروسته، هندواڼه په هېواد کې د مېوو په منځ کې تر ټولو لوړ تولید لري.
د کرنې وزارت له خوا د نوې کرنیزې ټکنالوژۍ کارونه، د اصلاح شویو تخمونو وېش، د کرنیزو وسایلو برابرول او د بزګرانو هڅونه ددې لامل شوې، چې د هندواڼو حاصلات د کمیت او کیفیت له پلوه د پام وړ ښه شي.
سره له دې، یو شمېر بزګران د بازار د نشتوالي، د بیو د ټیټوالي او له وارداتي مېوو سره د سختې سیالۍ له امله شکایت لري.
هندواڼه د لوړ حاصل، مناسب عاید او لوړ غذایي ارزښت له امله د هېواد له مهمو کرنیزو محصولاتو ګڼل کېږي او د بزګرانو لپاره د پام وړ عایداتي سرچینه ده.
د کرنې، اوبولګولو او مالدارۍ وزارت د اصلاح شویو تخمونو، کیمیاوي سرو او کرنیزو وسایلو له وېش سره هم‌مهاله هڅه کوي، څو د کرنیزو محصولاتو، په ځانګړي ډول د مېوو، د خرڅلاو لپاره په کورنیو او بهرنیو بازارونو کې غوره زمینه برابره کړي.