د زابل ولایت په اتغر ولسوالۍ کې د ۳ زره څارویو د واکسین لړۍ روانه ده
۱۵ مرغومې ۱۴۰۳ه.ش
۴ رَجَب المُرَجَّب ۱۴۴۶ه.ق
د زابل ولایت په اتغر ولسوالۍ کې د ۳ زره څارویو د واکسین چارې د کرنې، اوبولګولو او مالدارۍ ریاست له خوا روانې دي، چې پکې غت او واړه څاروي شامل دي.
د کرنې، اوبو لګولو او مالدارۍ ریاست په وینا، په دې کمپاین کې ۱زر او ۵۰۰ غټ څاروي او ۱زر او ۵۰۰ واړه څاروي واکسین کېږي. دا لړۍ د څارویو د ساتنې او ناروغیو مخنیوي په موخه پیل شوې، چې د یادې ولسوالۍ د کروندګرو لپاره حیاتي ارزښت لري.
چارواکي وایي چې واکسین به د څارویو د وژونکو ناروغیو مخنیوی وکړي، چې له کبله یې د مالدارۍ سکتور ته زیان اوړي.
اتغر هغه سیمه ده چې زیات شمېر خلک یې په مالدارۍ بوخت دي او د څارویو واکسین د دې ولسوالۍ د مالدارانو لپاره د اقتصادي زیانونو د مخنیوي په برخه کې یو مهم ګام ګڼل کېږي.
