د پکتیا د کرنې رئیس د میرزکې ځنګلونو د بیارغونې هڅې وڅارلې
د پکتیا د کرنې، اوبولګولو او مالدارۍ رئیس مولوي سیدامین هاشمي د ځنګل ساتنې مسؤلینو په ملتیا میرزکې ولسوالۍ ته سفر وکړ او د ځنګلونو د بیارغونې په اړه یې غونډه وکړه.
په دې غونډه کې د میرزکې ولسوال الحاج مولوي عبدالرحمن حبیبي، د ولسوال مرستیال، د ترویج عمومي مدیر، قومي مشرانو، او د ځنګلونو د ټولنو استازو ګډون وکړ. غونډه د نیازبیک تپې هغو برخو ته ځانګړې شوې وه، چې کرل شوي ځلغوزي یې یا پوره راشنه شوي نه وو یا د وچکالۍ له امله وچ شوي وو.
د قومي مشرانو او د ځنګلونو د ټولنو استازو تعهد وکړ، چې یاده ساحه به بیا کرل کېږي. غونډه د دعا په ویلو سره پای ته ورسېده.
