۳۴ ولایتونو کې د زعفرانو ۹۰۳ ننداریزې قطعې جوړول
۳ وږی ۱۳۹۹
د کرنې، اوبولګولو او مالدارۍ وزارت د ۱۳۹۹یم مالي کال له پیل څخه د زعفرانو د ۹۰۳ ننداریزو قطعو جوړول پیل کړ، چې له دې ډلې ډېری ننداریزې قطعې یې جوړې شوي دي.
د زعفرانو دغه ننداریزې قطعې هر یوه یې په نیم جریبه ځمکه کې د هېواد په ۳۴ ولایتونو کې جوړیږي. ددغو ننداریزو قطعو ډېری برخه بشپړ شوي دي او ټاکل شوې ده، چې د زعفرانو یاد ټول ننداریزې قطعې د کال تر پایه جوړې شي.
دغه راز د روان مالي کال په لومړی نیمایي، کې د پستې د زر هکټاره بڼونو د جوړولو په پار د کابل، غزني، میدان وردګ، لوګر، بامیان، دایکندي، بلخ، پکتیا، جوزجان، سرپل، سمنګان، بغلان، بدخشان، تخار، فاریاب، کندز، ننګرهار، کونړ، لغمان، هرات، پکتیکا، ارزګان، کندهار، هلمند، فراه، بادغیس، نیمروز او زابل په ولایتونو کې د پستې تخمونه وېشل شوي دي.
په همدې توګه دغزني، لوگر، پکتیا، بلخ، جوزجان، سرپل، سمنگان، بغلان، بدخشان، تخار، فاریاب، کندز، ننگرهار، کونړ، لغمان، هرات، خوست، پکتیکا، ارزگان، کندهار، هلمند، فراه، بادغیس او زابل په ولایتونو کې د پستې د ۲۸۵ هکټاره بڼونو د پیوند چارې هم پیل شوي دي او ټاکل شوې، چې د کال تر پایه بشپړ شي.
په ورته وخت کې، د کابل، کاپیسا، لوګر، پکتیا، بلخ، جوزجان، سرپل، بغلان، کندز، ننګرهار، کونړ، لغمان، هرات، خوست او کندهار په ولایتونو کې د کمپوسټ سرې د تولید د ۵۰ واحدونو د جوړولو چارې هم پیل شوي، چې د روان مالي کال تر پایه به یې رغنیزې چارې بشپړ شي.
دغه راز د کرنې وزارت د کابل په ولایت کې پر بزګرو مېرمنو د مرخېړیو د تولید ۷۰ کڅوړې هم وېشلي دي.
