کرنې وزارت کې د مدیریت اړوند درې ورځنی رونیز پروګرام پیل شو
۲۶ تله ۱۴۰۴ هـ.ش
۲۵ رَبِیعُ الْثاني ۱۴۴۷ هـ.ق
د کرنې، اوبولګولو او مالدارۍ وزارت د کارکوونکو چارو ریاست له لوري د یاد وزارت یو شمېر کارکوونکو لپاره د مدیریت اړوند درې ورځنی روزنیز پروګرام پیل شو.
یاد پروګرام مدیریتې برخو کې د کارکوونکو د وړتیا لوړولو په موخه جوړ شوی دی. د یاد درې ورځني روزنیز پروګرام په لړ کې به ګډونوال له مهمو موضوعاتو لکه د مدیریت بنسټیز اصول، د ادارې اساسي مفاهیم، د اسلام له نظره مدیریت، په اداري نظام کې سلسله مراتب، د ادارې جوړښت او د عامې ادارې ارزښت او اهمیت سره بلد شي.
د کرنې وزارت د کارکوونکو چارو ریاست د دې پروګرام موخه د کارکوونکو اداري او مدیریتې وړتیاوو پیاوړتیا بللې او ټینګار یې کړی، چې دوامدارې روزنې کولای شي د ادارو د فعالیتونو په ښهوالي کې اغېزمن رول ولوبوي.
د کرنې، اوبولګولو او مالدارۍ وزارت په وروستیو کلونو کې د خپلو کارکوونکو د مسلکي او اداري مهارتونو د لوړولو لپاره بېلابېل روزنیز پروګرامونه پلي کړي دي. دا درې ورځنی پروګرام هم د همدې لړۍ یوه برخه ده، چې موخه یې د دولتي کارکوونکو د مهارتونو لوړول او د ادارې د کیفیت لا ښهوالی دی.
