نیمروز کې د کرنیزو محصولاتو مدیرت د پروژې چارې په بشپړېدو دي

۲۶ لړم ۱۳۹۹
د نیمروز ولایت د کرنې، اوبولګولو او مالدارۍ ریاست چارواکي وايي، چې ددې ولایت په مرکز او درې ولسوالیو «چخانسور، چهاربرجک او خاشرود» کې د کرنیزو محصولاتو مدیریت د پروژې په اډانه د ۳۵ پروژو چارې روانې دي، چې رغنیزې چارې یې ۹۵ سلنه بشپړ شوي دي.
د نیمروز ولایت د کرنې ریاست وایي، چې په دې ولایت کې د کروندګرو او بڼوالو ستونزو د را کمېدو په پار ۳۵ پروژې پلي کیږي، چې په دغو پروژو کې د پیازو ۱۵ زېرمتونونه او ۲۰ ممیزخونې جوړول شامل دي، چې رغنیزې چارې یې ۹۵سلنه بشپړ شوي دي او پاتې چارې به یې هم ډېر ژر بشپړ او ګټې اخیستنې ته به وسپارل شي.
ددغو پروژو ټولیز لګښت ۱۴ میلیونه او ۹۵ زره او ۸۶۰ افغانۍ ده، چې لس سلنه یې برخمن شوي بزګران او ۹۰ سلنه یې دکرنې وزارت ورکوي.
د دغو پروژو په پلي کېدو سره به ددې ولایت د کروندګرو او بڼوالو د حاصلاتو د خرابېدو، خوسا کېدو او د ټیتې بیې پلور مخه ونیول شي تر څو له یوې خوا د کروندګرو حاصلات وساتل شي او لې بلې خوا د بازار مدیرت هم وشي.