ننګرهار کې لسګونه اړمنو کورنیو ته د چرګانو واړه فارمونه جوړ شول
۲۹ تله ۱۴۰۳ه.ش
۱۷ رَبِیعُ الْثاني ۱۴۴۶ه.ق
د ننګرهار د کرنې، اوبولګولو او مالدارۍ ریاست له خوا د ستاسو غږ«وا،وي،او» مؤسسې په همکارۍ ددې ولایت د کوټ او بټي کوټ ولسوالیو ۱۴۰ اړمنو کورنیو ته د دوی د اقتصادي پیاوړتیا په پار د چرګانو واړه فارمونه جوړ شوي دي.
د ننګرهار دکرنې، اوبولګولو او مالدارۍ رییس مولوی محمد ولي محسن وویل، چې هرې ګټې اخیستونکې کورنۍ ته د نغدې پیسې ترڅنګ ۳۰ قطعې کورني چرګان، د چرګانو دانه، درمل، دانه خوري او ابخوري، مرغانچې، جالۍ، کړکۍ، دروازې او نور اړین توکي ورکړل شوي دي.
ښاغلی محسن وویل، چې د چرګانو د ورکړي موخه په کور دننه بېوزله کورنیو ته د کار زمینه برابرول دي؛ ترڅو د خوړو خوندیتوب رامنځته او کورنۍ پر ځان بسیا شي.
دغه راز یادو کورنیو ته د چرګانو پاللو، ناروغیو مخنیوی د واکسینونو تطبیق کولو او ګڼو نورو برخو کې روزنه هم ورکول کېږي.
ددغو مرستو موخه په دې ولایت کې د چرګانو روزنې صنعت ته پیاوړتیا ورکول او د بېوزله او کونډو مېرمنو اقتصادي ودې ته په کور دننه زمینه برابرول دي.
