ننګرهار کې د کرنیزو او مالدارۍ پروژو د چټک تطبیق، پروسس مرکزونو ارزونه او ادارې اصلاحاتو په پار هلې ځلې
۹ مرغومې ۱۴۰۴ه.ش
۹ رَجَب المُرَجَّب ۱۴۴۷ه.ق
د ننګرهار د کرنې، اوبو لګولو او مالدارۍ ریاست د ادارې د اصلاح، کرنیزو خدمتونو د پیاوړتیا او د بزګرانو او مالدارانو د ملاتړ لپاره نوې برنامې پيل کړي دي. د یاد ریاست د اوونیز اداري غونډې په وروستۍ ناسته کې پر مهمو کرنیزو، مالدارۍ اپراختیایي پلانونو او اداري اصلاحاتو خبرې اترې وشوې.
د ناستې پر مهال، د پراختیایي بودیجې مصرف، په ولسوالیو کې د پروسس مرکزونو ارزونې، د عوایدو منظم راټولولو، د بیت المال ساتنه او د ادارې د شفافیت د لوړولو پر موضوعاتو خبرې وشوې.
د ننګرهار د کرنې رییس مولوی محمد ولي محسن ټینګار وکړ، چې باید د حاضري سیسټم ته جدي پاملرنه وشي، فساد مخنیوي، پروسس مرکزونو ارزونې اوستونزي په نښه او حل لار ورته ولټول شي، د ځمکو تشخیص لپاره په منظم او عادلانه ډول د مسلکي کسانو ګمارلو، ربع راپورونو او د کرنیزو او مالدارۍ پروژو عملي کېدو ته سرعت ورکړل شي.
ښاغلي محسن وایي، چې دا نوي اقدامات به د کرنیزو خدمتونو د کیفیت د لوړولو، د بزګرانو د عوایدو د زیاتوالي او د محلي اقتصاد د پیاوړتیا لامل شي. همدارنګه، د دې هڅو موخه دا ده، چې د کرنیزو او مالدارۍ چارو د روڼتیا، همغږۍ او حساب ورکولو کچه لوړه شي.
دننګرهار د کرنې رییس د بزګرانو د ملاتړ لپاره د علمي معلوماتو او تخنیکي روزنې پروګرامونه به هم پراخ شي، ترڅو د عصري کرنیزو لارو چارو په مرسته د حاصلاتو کچه لوړه شي. د غونډې ګډونوالو خپلې ستونزې او وړاندیزونه هم شریک کړل، چې د حل لپاره یې د ننګرهار د کرنې رییس ډاډ ورکړ.
