ننګرهار کې د تېلي او صنعتي نباتاتو ٦٠ ننداريزې کروندې جوړېږي

۲چنګاښ ۱۴۰۰
د ننګرهار د کرنې، اوبولګولو او مالدارۍ ریاست په دې ولایت کې دتېلي او صنعتي نباتاتو د کرکېلي د پراختیا او د تولید زیاتوالي په پار د تېلي نباتاتو ٦٠ ننداریزې کروندې جوړوي.
یاد ننداریزې کروندې، چې په کې ممپلې، کونځلې، لمرګل او سویابین شامل دي د ننګرهار ولایت په بېلابېلو سیمو کې جوړېږي.
د ننګرهار کرنې ریاست چارواکي وايي، چې د دغو ننداريزو کروندو د جوړولو په پار پر يوشمېر بزګرانو د يادو نباتاتو تخمونه او کيمياوي سرې وېشل شوي دي. د دوی په خبره په دې ولایت کې د ممپلي ١٣، د کونځلو ٧، د لمرګل ٢٠ او د سویابینو ٢٠ ننداریزې کروندې جوړېږي، چې د جوړولو په پار یې هر بزګرته د ننداریزو کروندو جوړولو په پار د ممپلیو ١٥ کېلو اصلاح شوې تخم او ترڅنګ یې ۲۵ کیلو «ډي،ای، پي» او ۵۰ کیلو یوریا سره وکړل شوي دي او دغه راز د کونځلو ٧ ننداریزو کروندو جوړولو په پار هر بزګر ته د کونځلو درې کیلو اصلاح شوې تخم او ترڅنګ یې ۲۵ کیلو «ډي،ای، پي» او ۵۰ کیلو یوریا ، دلمرګل څلور کیلو اصلاح شوي تخم او ترڅنګ یې ٢٥ کیلو ډي آي پي او ٥٠ کیلو یوریا او د سویابینو ١٢ کیلو اصلاح شوې تخم ترڅنګ ٢٠ کیلو ډي آي پي او ١٥ کیلو یوریا سره وکړل شوي دي.
د دغو ننداریزو کروندو د جوړولو موخه د صنعتي او تېلي نباتاتو دودول دي.
د یادو ننداریزو کروندو په جوړولو سره، د برخمن شویو بزګرانو ترڅنګ نور بزګران هم کولی شي، چې د یادو بوټو د کرکېلي او روزنې لارې چارې زده کړي.
د ننګرهار د کرنې، اوبولګولو اومالدارۍ ریاست په پام کې لري، چې د منظمو ترویجې او تشویقي برنامو په لاره اچولو سره په دې ولایت کې د یادو ارزښت لرونکو نباتاتو د تولید او پروسس صنعت پیاوړي کړي.