لوګر کې د نږدې لس میلیونه افغانیو په لګښت د اوبولګولو شبکه ګټې اخیستنې ته وسپارل شوه

۲۱ سلواغه ۱۳۹۹
د لوګر ولایت د محمدآغې ولسوالۍ اړوند د ذاهد آباد سیمې د اوبولګولو شبکې د رغولو چارې بشپړ او ګټې اخیستنې ته وسپارل شوه.
په دې اړه جوړه شوې غونډه کې، د لوګر والي عبدالقیوم رحیمي، د کرنې رییس عبدالله تسل او د یاد ولایت د ملکي او نظامي ادارو یوشمېر چارواکو کډون درلود.
د لوګر د کرنې رییس عبدالله تسل وایي، چې د اوبولګولو یاده شبکه ۳.۱۵ کیلومتره اوږدوالی لري او څه باندې درې زره او ۵۰۰ جریبه ځمکه خړوبوي او سلګونه کورنۍ ورڅخه هر اړخیزه ګټه پورته کوي.
د اوبولګولو د یادې شبکې د رغولو ټولیز لګښت ۹.۹میلیونه افغانۍ ده، چې دکرنې وزارت د خلکو په ګډون دکرنې او مالدارۍ پروژې «CLAP» له خوا د یوه کال په موده رغول شوې ده.
ددې شبکې په رغولو کې د سیمې یوشمېر اوسیدونکو ته  دکار زمینه هم برابره شوې وه او ترڅنګ یې ۴۰ سلنه د اوبو له ضایعاتو څخه مخنیوی کوی او همداراز د هغو ځمکو کرنیز محصولات به هم  ۲۵ سلنه لوړ شي، چې د دې شبکې له لارې خړوبېږي.