لغمان کې ۲۳۰۰ مالدارو کورنیو سره د څارویو د خواراکي توکو مرسته وشوه
۸ چنګاښ ۱۴۰۰
د لغمان دکرنې، اوبولګولو او مالدارۍ ریاست د «NCRO» همکارې موسس په همکارۍ ددې ولایت په ۲۳۰۰ مالدارو کورنیو د څارویو متراکم خوراکي توکي وېشلي دي.
د لغمان دکرنې رییس محمدجمیل خوشحال وایي، چې ددې ولایت مرکز مهترلام ۱۰۰۰ او د قرغیو ولسوالۍ ۱۳۰۰ مالدارانو هر مالدار ته ۲۰۰ کیلو د څارویو خوراکي توکي ورکړل شوي دي.
یادې مرستې د برخمن شویو مالدارانو د ملاتړ او ددې ولایت د مالدارۍ د پراختیا په پار تر سره شوي دي.
ښاغلی خوشحال وایي، چې د یادو حیواني خوراکي توکو د وېش موخه، د وچکالۍ ځپلو مالدارانو د مالونو خوندي کول، مالدارانو ته د متراکمو خوراکي توکو دودول، دمالدارانو هڅول، د لبنیاتو او غوښو زیاتوالي، د مالونو ښه روزنه، د مالدارانو ملاتړ او په بېړنیو حالاتو کې مالدارانو سره د څاریو د خوراکي توکو مرسته کول دي.
باید وویل شي، چې دکرنې، اوبولګولو او مالدارۍ وزارت وچکالۍ ځپلو مالدارنو سره د مرستې په پار د هېواد په بېلابېلو سیمو کې په مالدارانو د څارویو د خوراکي توکو دوېش لړۍ پیل کړی دی.
