لغمان کې یو ستر کرنیز مارکېټ ګټې اخیستنې ته وسپارل شوه
۹ وری ۱۳۹۸
د لغمان د کرنې، اوبولګولو او مالدارۍ ریاست چارواکي وایي، چې ددې ولایت د قرغیو ولسوالۍ اړوند د سرخکانو په سیمه کې د سبو او مېوو یو ستر کرنیز مارکېټ جوړ او ګټې اخیستنې ته وسپارل شوه.
د لغمان د کرنې رییس انجنیر محمدجمیل خوشحال وویل، چې یاد مارکېټ د نهه میلیونه افغانیو په لګښت سره د خصوصي سکټور له خوا جوړه شوې ده، چې ۲۳ غرفې لري او په پنځه جریبه دولتي ځمکه کې رغول شوې ده.
ښاغلي خوشحال وویل، چې یاد مارکېټ د لغمان ولایت په تېره بیا د قرغیو ولسوالۍ بزګرانو لپاره لویه لاسته راوړنه ده. دهغه په خبره په دې مارکېټ کې د لغمان او په ځانګړې توګه د قرغیو ولسوالۍ د بزګرانو او بڼوالو سبو او مېوو به په مناسب ډول د پلور زمینه برابره شي، چې د بزګرانو او بڼوالو د عوایدو د لوړوالي لامل هم کیږي.
