لغمان کې پر یوشمېر بزګرانو د شولو د اصلاح شویو تخمونو د وېش لړۍ پیل شوی دی
۱۲ غویی ۱۴۰۰
د لغمان دکرنې، اوبولګولو او مالدارۍ ریاست وایي، چې ددې ولایت پر یوشمېر بزګرانو د شولو د ۱۸ ټنه اصلاح شوي تخمونو د وېش لړۍ ددې ولایت له مرکز مهترلام څخه پیل شوې ده.
د لغمان دکرنې رییس محمد جمیل خوشحال وایي، چې د شولو دغه ۱۸ ټنه اصلاح شوي تخمونه ددې ولایت د مرکز مهترلام ترڅنګ د الینګار، الیشنګ او قرغه یي په ولسوالۍ کې پر بزګرانو وېشل کېږي.
د ښاغلي خوشحال په خبره د شولو د ۱۸ ټنه اصلاح شویو تخمونو له ډلې، شپږ ټنه یې مهترلام کې، څلور ټنه یې الینګار، څلور ټنه یې الیشنګ او څور ټنه نور یې د قرغه یي په ولسوالۍ کې پر بزګرانو وېشل کېږي.
یاد تخمونه د سبسایډې په بڼه پر بزګرانو وېشل کېږي، چې ۶۰ سلنه لګښت یې بزګران ورکوي.
ددغو تخمونو دوېش موخه په دې ولایت کې د وریجو د حاصلاتو زیاتول او د بزګرانو ملاتړ دی.
