لغمان کې د کرنیزو محصولاتو مدیریت د پروژو چارې د بشپړېدو په درشل کې دي
د لغمان په ولایت کې د کرنیزو محصولاتو مدیریت اړوند د ۲۹۰ پروژو چارې به په نږدې راتلونکې کې بشپړ او ګټې اخیستنې ته به وسپارل شي. دغه پروژې د برخمن شویو بزګرانو په لس سلنې او دکرنې وزارت په ۹۰ سلنه ونډې سره د ۸۶.۲ میلیونه افغانیو په لګښت پلي کیږي.
د لغمان د کرنې رییس جمیل خوشحال وویل، چې په دغو پروژو کې د پیازو او کچالو ۱۹۰ صفر انرژۍ زېرمتونونه جوړول شامل دي، چې رغنیزې چارې به یې په ۲۰ ورځو کې بشپړ شي. ښاغلی خوشحال وویل، چې د یادو زېرمتونو ترڅنګ پر یوشمېر بزګرانو د سبو او مېوو ۱۰۰ لمریز وچوونکي دستګاوې وېشل هم ددغو پروژو یوه برخه ده. دغه پروژې ددې ولایت په مرکز مهترلام او د قرغه یي، الینګار او علیشنګ په ولسوالیو کې پلي کيږي.
یادې پروژې ددې ولایت د کرنیزو محصولاتو مدیریت، د بڼوالو او بزګرانو د محصولاتو خوندي کولو او د دوی د عوایدو زیاتولو په پار په لاره اچول شوي دي.
