لغمان کې د کرنیزو توکو ۲۶ وړې سړې خونې جوړیږي

۷ مرغومی ۱۳۹۸
د کرنې، اوبولګولو او مالدارۍ وزارت د لغمان ولایت بزګرانو لپاره د پیازو، کچالو او نورو کرنیزو توکو ۲۶ وړې سړې خونې جوړوي.
د لغمان د کرنې، اوبولګولو او مالدارۍ رییس محمد جمیل خوشحال وایي، چې د کرنیزو توکو یاد سړې خونې ددې ولایت په مرکز مهترلام او د قرغه یي او علیشینګ په ولسوالیو کې جوړیږي.
ښاغلی خوشحال وویل، چې د کرنیزو توکو دغه جوړېدونکي سړې خونې د ۵-۷ او ۱۰-۱۵ ټنه کرنیزو توکو د ساتنې په ظرفیت جوړیږي.
د ښاغلی خوشحال په خبره ددغو سړوخونو د جوړولو ټولیز لګښت ۶.۵۵ میلیونه افغانۍ ده، چې د جوړولو چارې به یې تر یوه کاله بشپړ او ګټې اخیستنې ته به وسپارل شي.
د لغمان دکرنې رییس وایي، چې د پيازو او کچالو د سړو خونو په جوړېدو سره به د بزګرانو ستونزې هوارې او کال دوولس میاشتې به په مارکېټونو کې پیاز او کچالو په مناسبه بیه وموندل شي .
ددې ترڅنګ بزګرانو او د پیازو او کچالو سوداګر د یادو سړوخونو په جوړیدو خوښي څرګنده کړه او زیاته یې کړه، چې تر دې وړاندې د سړو خونو د نشتوالي له امله یې پياز او کچالو په ارزانه بیه پلورل کېدل، چې هم دوی ته هم بزګرانو ته یې زیان ډېر و.
باید وویل شي، چې په دې وروستیو کلونو کې د کرنې، ابولګولو او مالدارۍ وزارت له خوا بزګرانو او سوداګرو ته د اسانتیاوو برابرولو په پار د هېواد په بېلابېلو ولایتونو کې د پیازو او نورو سبو او مېوو د زېرمه کولو او ساتلو په موخه لسګونه سړې خونې جوړې شوي دي.