غزني کې ۴۳ بېوزله کورنیو ته د هګۍ ورکوونکو چرګانو د وېش لړۍ بشپړه شوه
۲۳ مرغومې ۱۴۰۴ه.ش
۲۳ رَجَب المُرَجَّب ۱۴۴۷ه.ق
د غزني ولایت د کرنې، اوبولګولو او مالدارۍ ریاست د «اکشن اېډ» مؤسسې په همکارۍ، د غزني ښار اړوند یو شمېر کلیو کې ۴۳ مستحقو او بېوزله کورنیو ته د هګیو ورکوونکو چرګانو د وېش لړۍ په بریالیتوب سره بشپړه کړه.
د یاد پروګرام له مخې، هرې کورنۍ ته ۲۵ د هګیو ورکوونکي چرګان، ۵۰ کیلو ګرامه د چرګانو خوراکي مواد، ۶ پایې اوبخورې او دانېخورې وسایل، ۷ متره توره جالي او ۲۵۰ ګرامه ملټيویټامین ورکړل شول.
د غزني دکرنې ریاست چارواکي وایي، چې د دې پروګرام موخه د بېوزله کورنیو اقتصادي پیاوړتیا، د چرګانو روزنې ته وده ورکول، د خوړو خوندیتوب لوړول او د حلالو عوایدو د دوامدارې سرچینې برابرول دي.
دوی همدارنګه د «اکشن اېډ» مؤسسې له همکارۍ څخه مننه وکړه او مستحقو کورنیو ته یې سپارښتنه وکړه، چې له ورکړل شوو امکاناتو څخه مثبته، سمه او دوامداره ګټه واخلي، تر څو وکولای شي خپله اقتصادي خپلواکي تر لاسه کړي.
