د کندهار ژړۍ ترویجي فارم کې د ځنګلي نیالګیو د قلمو اېښودلو چارې پیل شوې
۱۱ کب ۱۴۰۴ه.ش
۱۳ رَمَضانُ المُبارَک ۱۴۴۷ه.ق
د کندهار د کرنې، اوبو لګولو او مالدارۍ ریاست د کندهار د ژړۍ ولسوالی په روزنیز فارم کې پر ۱۶ جریبه ځمکه د ۳۲۰ زره ځنګلي نیالګیو لپاره د قوریي جوړولو چاري پیل کړي دي.
د ژړۍ ولسوالی د څړځایونو او ځنګلونو مدیر انجنیر عزت الله ایوبي وایي، یاده قوریه د کرنې وزارت د طرزالعمل له مخې د ځنګلي بوټو له قلمو څخه جوړېږي، ترڅو روزل شوي نیالګي وروسته د چاپېریال ساتني، د ځنګلاتو او شنو سیمو پراختیا، د څړڅایونو پیاوړتیا او اقلیمي بدلونونو د اغیزې کموالي لپاره وکارول شي.
نوموړي وایي، یاده قوریه د کرنې وزارت د پلان مطابق اېښودل کېږي او د تخنیکي اصولو په نظر کې نیولو سره د ځمکې چمتو کول، د قلمو معیاري انتخاب، منظم قطار بندي، اوبه لګول او ساتنه په منظم ډول ترسره کېږي.
قوریه د نیالګیو د روزنې او ودې منظم کرنیز سیستم دی، چې پکښې قلمي یا تخمونه لومړی په ځانګړې ځمکه کې کرل کېږي او له مناسبې ودې وروسته اصلي ساحې ته انتقالېږي.
د یادونې وړ ده، چې یوه اوونۍ وړاندې هم د ژړۍ ولسوالی په روزنیز فارم کې د یو میلیون آنجې نبات قوریه جوړه شوې وه.
