د کندهار دامان کې د وترنري انستيتوت ۳۰ زدهکوونکو ته عملي روزنه ورکول شوه
کندهار د کرنې، اوبو لګولو او مالدارۍ ریاست په همکارۍ، د څارویو د روغتیا سرپرست آمر مولوي عبدالغني عفان په تخنیکي ملاتړ د کندهار دامان ولسوالۍ د کرنې او وترنري انستیتوت ۳۰ تنو محصلینو ته په کندهار مرکز کې د څارویو د روغتیا په برخه کې عملي روزنه ورکړه.
د دې روزنې په ترڅ کې، چې د څارویو د روغتیا امریت د فني وترنرانو لهخوا ترسره شوه، زدهکوونکو ته د څارویو روغتیایي سابقه، درملنه او معاینه، وقایوي تدابیر، واکسین لګول، موسمي ناروغۍ پېژندل، د داخلي او خارجي پرازیتونو مخنیوی او څارویو ته د پیچکارۍ کولو په اړه عملي روزنه ورکړل شوه.
په ورته وخت کې، د روزنې څخه برخمن شوي زدهکوونکي خوښي څرګندوي چې د وترنري په برخه کې عملي تجربې ترلاسه کوي. هغوی د کرنې ریاست او د څارویو د روغتیا مسؤلینو څخه مننه کوي او په راتلونکي کې د ورته نورو روزنیزو پروګرامونو غوښتنه کوي.
یادونه باید وشي چې د کندهار کرنې، اوبو لګولو او مالدارۍ ریاست د افغانستان اسلامي امارت له راتګ سره د کرنې او مالدارۍ برخې ته ځانګړې پاملرنه کړې. بزګرانو او مالدارانو سره مرستې شوي، ښې سپارښتنې ورته شوي او د ناروغیو په وړاندې وقایوي تدابیر نیول شوي، چې له امله یې په کندهار کې کرنې او مالدارۍ د پام وړ پرمختګ کړی دی.
